मध्यरात्रीचे महाऑपरेशन : सोमाटणे टोलवर पिंपरी-चिंचवड पोलिसांची धडाकेबाज कारवाई; कुख्यात टोळी जेरबंद
प्रतिनिधी श्रावणी कामत
महा पोलीस न्यूज ! ऑनलाईन पुणे सोमाटणे(मावळ):बुधवारी दि २६ नोव्हेंबर रोजी मध्यरात्री तळेगाव दाभाडेजवळील शांत परिसराला अचानक सायरनचा आवाज आणि गोळीबाराच्या दणदणाटाने हादरा बसला. सोमाटणे टोल नाक्यावर पिंपरी-चिंचवड पोलिसांच्या युनिट २ ने राबवलेल्या गुप्त आणि धाडसी कारवाईत कुख्यात गुन्हेगारांच्या टोळीला चक्क टोल प्लाझावरच कोंडीत पकडत तीन सराईत गुन्हेगारांना जेरबंद करण्यात यश मिळाले.
गुन्हेगारांच्या हालचालींचा मागोवा घेत असताना पोलिसांना मिळालेल्या विशिष्ट माहितीवरून ही कारवाई राबवण्यात आली. मध्यरात्री टोळी टोल नाक्यावरून जात असल्याची माहिती मिळताच युनिट २ च्या पथकाने परिसरात काटेकोर जाळे उभारले. संशयित वाहन टोलवर थांबताच पोलिसांनी त्यास घेराव घातला. स्वतःला सापळ्यात अडकलेले पाहताच टोळीतील काही सदस्यांनी गोळीबार करून पळ काढण्याचा प्रयत्न केला. मात्र, पोलिसांच्या चपळाईपुढे त्यांचे सर्व डाव उधळून लागले आणि थरारक पाठलागानंतर तिघांना ताब्यात घेण्यात आले.
अटकेतील आरोपींकडून दोन देशी कट्टे, जिवंत काडतूस तसेच अलीकडील घरफोड्यांमध्ये लुटलेल्या मौल्यवान वस्तू असा मुद्देमाल जप्त करण्यात आला आहे. त्यापैकी एका आरोपीवर मोक्का लागू असल्याची प्राथमिक माहिती पोलिस सूत्रांनी दिली असून, उर्वरित साथीदारांचा शोध सुरू आहे.
तळेगाव दाभाडे व आसपासच्या भागात गेल्या काही महिन्यांपासून या टोळीने धुमाकूळ घातला होता. घरफोड्या, जबरी चोरी आणि धमकावण्याच्या घटनांमुळे नागरिक भयभीत झाले होते. मध्यरात्रीच्याच कारवाईत या टोळीचा बंदोबस्त झाल्याने स्थानिकांनी सुटकेचा निश्वास सोडला असून पोलिसांच्या वेगवान प्रतिसादाचे कौतुक सोशल मीडियातही उमटू लागले आहे.
विशेष म्हणजे निवडणूक आचारसंहिता सुरू असताना केलेल्या या कारवाईने राजकीय वर्तुळातही चांगलाच चर्चेचा विषय निर्माण केला आहे. या घटनेनंतर तळेगाव परिसरातील सुरक्षा व्यवस्थेवर पुन्हा प्रकाशझोत पडला असून पोलिसांच्या धडाकेबाज पथकाचे सर्वत्र अभिनंदन केले जात आहे.
मुख्य संपादक :- पंकेश जाधव
