रात्रीस खेळ चाले वाळू माफियांच्या ! शासकीय गौणखनिज चोरी…
पत्रकार :- विशाल धाकतोडे ( पुणे ग्रामीण)
महा पोलिस न्यूज ! ऑनलाईन पुणे :- अवैधपणे वाळूचे उत्खनन व वाहतुकीवर बंदी असतानाही महसूल विभागाच्या नाकावर टिचून मुळा मुठा नदी पात्रातून बेकायदा वाळू उपसा सुरू आहे. त्यामुळे शासकीय गौणखनिज चोरीला गेल्याचा धक्कादायक प्रकार भावरापुर उरुळी कांचन (ता. हवेली) येथे आहे. वाळूमाफिया टोळ्यांकडून नद्यांची लचकेतोड सुरू असून महसूलच्या मेहेरबानीने खुलेआम वाळू चोरी सुरू आहे, अशी चर्चा दबक्या आवाजात नागरिकांमध्ये सुरु आहे. याबाबत महसूल विभागाच्या मंडल अधिकारी कार्यालयाला थांगपत्ता लागत नसल्याने प्रशासनाच्या कार्यक्षमतेवर संशय निर्माण होत आहे
गेल्या अनेक दिवसांपासून भावरापुर उरुळी कांचन (ता. हवेली) येथे मुळा मुठा नदीच्या पात्रातून अवैध वाळू उपसा सुरू आहे. वाळूमाफियांनी रात्रीच्या अंधाराचा फायदा घेऊन मुळा मुठा नदी पात्रातून फायबर बोट सहाय्याने बेकायदा वाळूचे उत्खनन केले. या उत्खननातून सुमारे शेकडो ब्रास वाळूची चोरी केली.
शासनाकडून कुठलीही परवानगी दिलेली नसताना बेकायदेशीर वाळूची चोरी करून शासनाच्या नियमांना पायदळी तुडवण्याचे काम सर्रासपणे सुरू आहे. मात्र, महसूल विभाग व स्थानिक प्रशासनाकडून या वाळू माफियांवर अद्याप कुठलीच कारवाई केली जात नसल्याचे स्पष्ट दिसून येत आहे. हा प्रकार कोणाच्या आशीर्वादाने सुरु आहे? या प्रकरणाची सखोल चौकशी करून या वाळू माफियावरती महसूल विभागाकडून कायदेशीर कारवाई करण्यात यावी, अशी मागणी भवरापुर् उरुळी कांचन ग्रामस्थांनी केली आहे.
दरम्यान, मुळा मुठा नदीवर या भागातील शेतीला होणारा पाणी पुरवठा व पिण्याच्या पाण्याच्या योजना अवलंबून आहेत. मागील काही दिवसांपासून या नदी पात्रात वाळू माफियांच्या टोळ्यांनी उच्छाद मांडला आहे. नदीवर खुलेआम बिनदिक्कतपणे लचकेतोड सुरू असल्याने काही ठिकाणी नदीपात्राच्या नैसर्गिक प्रवाहाची दिशाच बदलली आहे. यामुळे आसपासच्या शेत जमिनीच्या क्षेत्रांना धोका निर्माण झाला आहे.
रात्री उशिरा दहानंतर ते पहाटे पाच वाजेपर्यंत , फायबर बोट सहाय्याने वाळू उपसा केला जातो. वाळू माफियांनी बेसुमार उपसा केल्याने नदी पात्रात मोठे खड्डे पडले आहेत. पर्यावरणाचे नुकसान होत असल्याने या भागातील पर्यावरण प्रेमींनी बेकायदा वाळू उपसा तात्काळ बंद करण्याची मागणी केली आहे. परंतु, हवेली महसूल विभागाने ‘हाताची घडी अन् तोंडावर बोट’ असे धोरण ठेवल्याने वाळू माफियांनी नदीपात्रात अक्षरक्षः हैदोस घातला आहे.
मुख्य संपादक :- पंकेश जाधव
